Tuis

Ek is al vir die afgelope 34 jaar ‘n onderwyser by Vrede Hoërskool, vanaf 1986. Die gees van die skool, onderwysers,kinders en ouers was nog altyd iets besonders, ‘n kombinasie wat jy nie maklik elders sal kry nie. Dit is wat my nog altyd hier laat bly het.

Die naam Hoërskool Vrede bring ‘n oplewing en heimwee in baie mense se oë, hulle verlang na hul alma mater,want dit is hier waar hul grondslag en boustene vir hul toekoms gelê is.Die huidige generasie raak opgewonde, want hierdie skool IS hul mater.

By Hoër- en Laerskool Vrede weet die leerders : Hoe harder jy werk , hoe harder word jy toegelaat om te speel. Vra vir enigeen oor Vrede se legendariese rugbyspanne en met 31 jaar se 100% matriek-slaagsyfer is ons net so bekend vir ons uitnemende akademie en topgehalte onderwysers.

Soos dit baie keer in die regte lewe gebeur, kom hierdie skool ook van tyd tot tyd voor groot uitdagings te staan, maar hier skrik ons nie vir enige uitdaging nie. Ons pak hom by die horings en maak die beste van die saak. Ons laat ons nie onderkry nie, deur niks nie. Ons leuse is nie verniet MIK HOOG nie. Ons skool sal altyd bo uitkom, veral met so ‘n positiewe personeel en ondersteunende beheerraad.

Ek, persoonlik, vind groot vreugde in my werk en streef daarna om elke leerder só toe te rus dat hulle elkeen ook eendag so kan sê. Ons leerders is die toekoms, nie net hier in Vrede nie, maar wêreldwyd moet hulle hul man kan staan en hier by ons rus ons hulle hiervoor toe. Hoekom? Want ons kan!
Hier by Hoër- en Laerskool Vrede, in ons klein kinderkring, skep ons groot geeste.